Helge und Värs - Familie M. Steiner

FASNACHT 2019

Helge & Värs

Dr Almi und dr Salvi die hän in de letschte Joore
noch Zaanlugge und Ranze au no s Publikum verloore.
Jetz sin si im Europapark als Retter engagiert
e kurze Uffdridd längdd - und scho isch evakuiert.

Frankriich ziet dr Stegger z Fesseheim im AKW
und im Rhyy do kasch im Summer fascht dr Boode seeh.
Drum spaare mir deheim jetzt Stroom ihr sottet das au iiebe
sunscht mien am Änd die arme Schugger - ihri Tesla schiebe.

Truurig und voll Wehmuet sin mir über d Muba gloffe
noch über 100 Joor kunnt s Änd das macht ys sehr bedroffe.
Mir hoffe uff e neui Mäss mit Ussteller e huffe,
dört kaufe mir zwar wieder nüt - drfür kasch gratis suffe.

D Kinese mergge uff em Mond, dasch sensationell
die dunggli Sitte isch nit dunggel die isch nämmlig hell.
Viil heller sehts jetzt au dr Brunner är hets ändlig tscheggd
si Kopf het z lang im dunggle - Hinterdeil vom Blocher gschteggd.

Am Dorf-Turnfescht verkauft bi uns d Fraueriigi Löösli
„jedes Loos e gwünn" verspricht im Babbe s Maier Röösli.
Im Dorf do laufts halt gliich wie das bim FC Basel isch
bim Fescht mien d Fraue schaffe - und d Niete sin am Disch.

Dr Donald lüttet ganz nervös sinre Melani-a
und brichtet vomne Gschbrööch mit em Präsidänd vo Kiina.
Im Land vom Drache sige si jo au nit viil Humaner,
die hän scho lang e Muure - und drum keini Mexikaner.

Noch de Gschbrööch mit Kiina haut dr Trump dr Wessels a
ob denn Basel au Problem mit Mexiko wurd ha.
Är findet drum die hoche Muure z Basel wunderbar
Herr Trump das sin nit Muure - das sin unseri Trottoir.

Noch sim Schiffbruch mit em Fischerboot het är neui Plään
dr Silberiise d Mamme freuts wird Traumschiffkapitään.
Und falls är dört au Schissdrägg baut hän mir dr Verdacht
är kennt dr Hampe Wessels - dä weiss au nid was är macht.

Mir foordere dr gliichi Loon ob Frau bisch odr Maa
nur dien si das schiins nit emoll im Bundesroot so ha.
Und wurd me sii moll wääle dert denn sin mir gspannt was goot,
bekunnt d Martullo Loon - als Bundesröötin odr Root?

Ihr könneds alli glaube s isch uns wirgglig ganz egal,
ob öbbis Koscher broduzierd isch odr au Halaal.
Mir finde multikulti guet Rassismus liggd is färn,
mir hän deheim halt eifach - Toblerone nid so gärn.

Mir sin genau so wie mir sin denn wie mir sin macht Sinn
und sin mir nit so wie mir sin denn isch kei Logig din.
Drum sinn mir lieber eifach so und mir wurde wette
ihr sind doch lieber au wie ihr - und nid wie d Bätschlerette.

Im Alkohol und Fleischkonsum setzd d Mamme jetzt e Gränze
es stinggd ihre drumm rächt deheim die Männer-Flatulänze.
Doch sit me wiili müffeleds nach richtig miisem miif
untrem Sofa liggd vergammlet - e Versichrigsdedektiv.

Mir sin uff Russland und hän d Schwizer Nati unterstützt
und freudig gstuunt wie Schutte doch bim integriere nützt.
Unsri wilde Männer staargg wie Löie spiile d Geegner stiff
und zum Abschluss macht dr Xhaka denn - no ein uf Vogelgryff.

Unsre Glai do mit dr Punkfrisuur, lehnt sich gärn mol uff
nid nur gege d Ornig und s uffruume vo sim Buff.
Är het au an e Demo vo so gääle Weschte welle
drbi sin das in Basel nur - BVB Baustelle.

Dr Babbe meint i ha dr längscht dr Jung seit nei s isch miine
im Opi sin dä isch zwar schön nur leider biz e kliine.
Ihr dängget alli rächt versaut bim wär dr länger hett
im Värs goots nur um s neue - Basler Hoochhuusbau Quartett.

Bis zletscht het är alles gä und alles usbrobiert
und bis zletscht het är die halbi Schwiiz terrorisiert.
Bis zletscht het är nit gmerggd, das si ihn zum Duubel macht
ihri Vorwahl die isch eigentlig - 078.