Helge und Värs - Familie M. Steiner

FASNACHT 2023

Helge & Värs

D Schwinger hän e Läbenskriise
s goot um ihri Läbendpriise
wägem Pratteler Debaggel
gits als Hauptpriis jetzt e Daggel

Sit si die Liebeskuugle het
liggt d Mamme d Nacht lang wach im Bett
druff seit dr Jung du weisch scho gäll
das sin so Migros Kaffi Bäll

Karli und Opi euch zum Wohl
mit achzig no gärn ein im Gool
dr Unterschiid bi däne zwei
„Ich find meischtens sälber hei“

D Adela Smaic hesch vernoo
het s TeleBasel Gschäft verloo
es drifft uns hart und mir sin stumm
und z China gheit e Riissagg um

Dr Opi het friener dr Queen
d Krone poliert moll hart moll fiin
jä s Bethli isch wild gsi wie sau
är hofft dr Charles wott das nit au

Dr FCB spiilt in zwei Däg
mir mache uns scho uff e Wäg
well wotsch e Bier und Brootwurscht ha
denn stoosch am Beschte hüt scho a

Doch sehsch zur Zyt dr FCB
denn macht dr s Härz und d Auge weh
drum hörsch die eint und ander Stimm
s Aastoo sig nur halb so schlimm

Röschti Röschti Röschti Röschti
Röschti Röschti Röschti Röschti
Röschti Röschti so das wärs
das isch unsre Röschti Värs

S Wort vom Joor Strohmangelage
was kasch zu däm Wort no sage
s isch nüt wo gross hänge blibt
mir wüsse nit mol wie me s schribt

Dä Daag dä het io miesse ko
dr alti Papscht het dörfe go
jetzt singt dr Ander halt ellei
IHR KINDERLEIN KOMMET…

D Mamme baggt e Riebli-Kueche
wott dr Knaschti Boris bsueche
är isch wäg dien si verzelle
nit mol im Knascht hänsn welle

Dr Jung weiss immer no nit rächt
was isch für ihn s richtig Gschlächt
sig was wotsch nur ganz am Änd
wird io nit FIFA Presidänt

Zum neue Gsetz däm Nei heisst Nei
meint unsre Babbe z Münchestei
dasch nüt neus well bi uns dehei
seit d Mamme scho sit Joore „Nei“

Jetzt wo si wott e Buschi ha
sott unsre Babbe wieder dra
do kläbt är sich grad uss Protescht
sii Pfiffli an dr Stäge fescht