Helge und Värs - Familie M. Steiner

FASNACHT 2024

Helge & Värs

Wenn s Gäld stimmt ka s zur Trennig ko
sehsch s bi Novartis und Sandoz.
Mir wurde s ganz Ersparte gää
wurd öbber unsre Opi nää

Hösch Charlie du neu änglisch King
goosch gärn uf d Jagd dasch voll di Ding
statt heilig Graal und Drache jaage
kasch im Wallis Wölf an Kraage

Vom Doggter wott d Mamme die Sprützi
wo schiins vom digg wärde schützi.
"Au das", muess dr Opi lache
"wird uss dir kei Barbie mache"

Dangg e-Vignette ka d Frontschiibe
bi uns jetzt Kläber frei bliibe.
Doch jetzt hängt dört dasch dr Mischt
sit Wuche sone Aggtivischt.

S Volgg sig d Chefin seit dr Jans
das stimmt zum Teil aber nit ganz.
Bi uns deheim Herr Bundesroot
isch d Mamme die wo seit was goot

Dr Düüfel steggt schiins im Detail
das findet unsre Pfarrer geil
so gits no öbber het är tscheggt
wo gärn moll neume dinne steggt

Mir liebe dä neu Beatles-Song
au d Stones hörsch bi uns all night long
Do kasch uff gar kei Fall ruhig stoh
drum gwaggelet dr Biden so

Dr Babbe wott sich neu ussrichte
und uff s Mooler-Gwand verzichte
z Basel stellt me jetzt io glii
als Schugger fascht scho jede ii

Neus muess au bim Opi go
well s Hotel Basel isch nüm do
Au s Mascotte mit de heisse Nixe
jetzt muess är dehei Bier dringge

CS wird UBS dasch bitter
Nur no X heisst das nüm twitter
Au z Berlin isch das nit neu
dört wird e Wildsau schnäll zum Leu

D Steiners mien euch öbbis brichte
mir könne im Fall nit dichte
S Värslibrünzle macht KI
und Siri singt uns d Värs denn ii

Mit em Dramm in d Stadt go ässe
hän mir welle, kasch vergässe
well wotsch mit em Drämmli go
denn bruuchsch viel z lang - d Beiz isch nüm do

D BVB het Sitz lo teschte
welle wär für s Fudi s Beschte
das ka schiins wie d Jodtablette
wenn s moll rumplet s Füdle rette

D Mamme und ihri 12 runde
Fründinne wänn d Stadt erkunde
Glii nach däre Grossparade
het d Margrethebrugg dä Schaade

Drum mien die dralle Walking-Fraue
in de Bärge Späck abbaue
dört foht wäg däm stöggele
dä Bärg in Brienz a bröggele

Uf em Heimwäg dien die starke
Fraue bim St.Jakob parke
hälfe dört rasch dene Pfluume
unsre FCB uffruume

Und jetzt d Moral vo däre Gschicht
in Basel hän d Fraue meh Gwicht
jä well s uf däre Wält  z viil kracht
mien Fraue wie d Mamme an d Macht